Wednesday, July 2, 2008

صــيـانـــة الـســيـارة لـلــمـبــتــدئــيــن

نصائح عامة


* كل يومين تروح الصبح تفتح قربة المية وتشوف لو المية نقصة تملاها ضرورى جدا

* قبل ما تخرج بالعربية تبص على العجل لو لقيته ناقص هواء روح أظبطو و لو كانت الحكاية
دى متكررة خلى الراجل يشوفلك لو العجلة فيها خرم أو البلف مخروم و يلحملاك الخروم دى
و الحكاية دى مهمة لأنك لو ماشى بالعربية و العجل مش مظبوط الدريكسيون هيتقل
و كمان لو جيت تدى فرامل العربية هتلف معاك

* نصيحة دايما حاول تملا العربية بنزين و المؤشر عند الربع
لأن البنزين فى مصر فى شوائب كتير
فلما بتسيب العربية لأخر نقطة كده بتساعد أن فلتر البنزين يتسد بسرعة

* العربيات الجديدة كلها لما بتدورها الصبح بتلاقى ال RPM بيجى على واحد أو أعلى شوية
ده لأنها بتسخن نفسها أتوماتيك سيبها تسخن لحد لما تلاقى صوت الموتور بقى واطى و ال RPM قل
و تلاقى أمبير الحرارة على و ساعتها أتحرك عادى
و الحكاية دى مهمة جدا لأن العربية و هيا وقفة الزيت اللى فى المكنة بينزل لتحت
فلما بتسخن العربية الزيت بيتقلب جواها و الحديد بيتمدد و بيخلى الزيت يتخل فى جميع أنحاء المكنة
فلو أتحركت من غير تسخين للمكنة الأحتكاك هيزيد جوه المكنة و هتقلل من عمرها

__________________________________________________

البطارية

البطارية السائلة... أى بطارية جديدة بيبقى معاها ضمان سنة
بتروح كل شهر للمحل اللى أنتا شاريها من عنده بيزودهالك ماء مقطر بدون فلوس
لو قديمة لازم تبص كل فترة على مستوى المية فى كل عين من عيون البطارية
لو لقيتها نقصة روح للكهربائى و هوا هيزودهالك ماء مقطر و يغسلك القطب السالب بالمية المغلية
و يشحمه لأن الأملاح بتتجمع علية و ساعات بتغلس لما تيجى تدورها

البطارية الجافة....دى ملهاش صيانة ولا حاجة بس متهيألى بتشحم القطب السالب
و تنضفة من الأملاح بماء مغلى كل فترة (أنا مجربتهاش بصراحة)
دى ليها وقت معين يعنى بتبوظ ما بين 3 الى 5 سنين ولا زم تتغير علطول

__________________________________________________

فلتر البنزين

تغيرو لما تحس أن سحب العربية قل عن الأول
أو ثبت وقت معين يبقى أحسن يعنى كل 6000 كيلو حلو أوى لأن البنزين فى مصر مليان شوائب كتير

__________________________________________________

فلتر الزيت

تغيرو كل 6000 كيلو ....يعنى مع تالت تغيير لزيت المكنة أو مع تانى تغيير (4000)حسب فلوسك


__________________________________________________

فلتر الهواء

لما تحس أن العربية سحبها تقل و بتاكل بنزين زيادة و مبتشدش روح للمكانيكى و خلية يشوفهولاك
ممكن ينضفو بس و ميكنش محتاج تغيير
و فى ناس بتشوف شاكله لو لقوا الورق بتاعه بقى ملفوف أو مقوس يتغيرو
و ممكن تثبت فترة برضوا لتغيرو يعنى كل 6000 كيلو كدة


__________________________________________________

تغير الزيت

أنا بجيب زيت موبيل بيعد 3000 كم لكن لازم تغيرو كل 2000 للأمان لأن الجو فى مصر حر
و اللزوجة بتاعت الزيت بتخف و كمان أنا سمعت أن الزيوت دى بتبقى مغشوشة فللأمان غيرو كل 2000 كم .....ضرورى جدا تفتكر ممكن تظبط العداد بتاع الرحلات اللى بيقيس المسافة اللى العربية بتمشيها


__________________________________________________

زيت الجير

معظم الناس بتغيرو عند 10,000 كيلو لكن أنا كل ما بروح أغير زيت المكنة بخلى الراجل يشيك عليه للأطمئنان


__________________________________________________

زيت الكرونة

معظم الناس بتغيرو عند 10,000 كيلو لكن أنا كل ما بروح أغير زيت المكنة بخلى الراجل يشيك عليه للأطمئنان


__________________________________________________

تيل الفرامل

العربيات الجديدة بيبقى فيها لمبة بتبين لو كان خلص و لا لأ
و بشكل عام لو لقيت الفرامل ضعفت أو فى صوت صفارة لما بتدوس على الفرامل
روح للعفشجى يشوفهولك هوا و زيت الفرامل و كل فترة كدة أبقى بوص على زيت الفرامل
لو لقيتو بينقص يبقى غالبا التيل بيتأكل و تروح تشوفه


__________________________________________________

الترصيص و زبط الزوايا و الأتزان

لو فى عجلة أتخرمت عندك و حطيت الأستبن لازم تروح فى أسرع و قت ترصص العجل
لأنها بتعمل مشاكل فى العفشة خصوصا فى العربيات الجديدة

ظبط الزوايا مهم جدا لأن ناس كتير لما بتيجى تركن جنب رصيف و لا حاجة بتحك العجل فى الرصيف
أو لو خبط العجل فى طوبة كبيرة مثلا و طبعا الحفر اللى مليا الشوارع بتأثر برضوا
علشان كدة لازم كل فترة تروح تعمل ظبط زوايا و أتزان يعنى كل 3 شهور
و ظبط الزوايا مهم لأن لو العجل مش مظبوط لما تيجى تضرب فرامل العربية هتلف منك


__________________________________________________

بشكل عام الحاجات اللى ملهاش وقت معين زى فلتر الهواء بتبقى أنتا و أحساسك
يعنى حسيت العربية تقلت مش رادية تسحب فيها حاجة متغيرة روح للمكنيكى
وهوا يشوف بس يكون ثقة علشان ميلعبش بيك و يخدعك

__________________________________________________ _________________________

و يا رب أكون عرفت أوصلكم المعلومات بطريقة سهلة
و يا رب أكون فدتكم

منقول

No comments: